Joriy yilning 7-mart sanasida fuqaro “ЖАМОАТ НАЗОРАТИ” telegram kanali orqali “Mikrokreditbank” tomonidan Fargʻona shahrida barcha hujjatlari boʻlsa-da tadbirkorlarga majburiy sugʻurta qilish bahonasida kredit mablagʻlari ajratilmayotganini tanqid qilgan.
Ushbu murojaat bankning tegishli mutaxassislari tomonidan o‘rganilganda, fuqaro asossiz murojaat yo‘llagani va bu xabar telegram kanaldan o‘chirilgani ma’lum bo‘ldi.
Shu o‘rinda ta’kidlash kerakki, Oilaviy tadbirkorlikni rivojlantirish dasturi doirasida jismoniy shaxslarga ajratiladigan kreditlar qaytmaslik xatarini sug‘urtalash ishlari O‘zbekiston Respublikasi Prezidenti hamda Vazirlar Mahkamasining tegishli qarorlarida belgilangan talablar asosida amalga oshiriladi.
Jumladan, O‘zbekiston Respublikasi Vazirlar Mahkamasining 2022-yil 8-iyuldagi 373-sonli qarori bilan tasdiqlangan “Oilaviy tadbirkorlikni rivojlantirish dasturlarining yagona elektron platformasi orqali kreditlar ajratish tartibi to‘g‘risida”gi Nizomning 13-bandiga asosan, oʻzini-oʻzi band qilgan jismoniy shaxslarga hamda belgilangan tartibda davlat roʻyxatidan oʻtgan kichik tadbirkorlik subyektlariga kredit ajratilishida hokim yordamchisining tavsiyanomasi asos hisoblanishi va tijorat banklari oʻz mablagʻlari hisobidan kreditning qaytmaslik xatarini sugʻurtalashi belgilangan.
Shunga koʻra, oilaviy tadbirkorlik dasturlari doirasida jismoniy shaxslarga ajratilayotgan kreditlarning qaytmaslik xatarini sugʻurtalash bank tomonidan amalga oshiriladi, bunda qarz oluvchi sugʻurta bilan bog‘liq hech qanday hujjatni rasmiylashtirmaydi hamda sug‘urta uchun fuqaro tomonidan to‘lov amalga oshirilmaydi.
Bank Axborot xizmati
Yana ko‘ring
MKBANKning "Bank of China"da to‘g‘ridan-to‘g‘ri korrespondentlik hisobvarag‘i ochildi
MKBANKda raqamlashtirish bo‘yicha yana bir muhim yangilik!
