Navbatdagi kitob yarmarkasi “TaskinKitoblar” brendi bilan o‘tkazildi

Mikrokreditbankda navbatdagi kitob yarmarkasi “TaskinKitoblar” brendi bilan hamkorlikda tashkil etildi. 

Mikrokreditbank xodimlarining kitob oʻqishga ishtiyoqi balandligi har chorakda oʻtkazilib kelinadigan kitobxonlik tanlovlari, turli intellektual oʻyinlarda yanada yaqqolroq namoyon boʻladi. Aslida, hisob-kitob, pul kredit siyosati sohasi vakillarining nafaqat ilmiy yoki sohaviy bilimlarga ega boʻlishi, balki dunyoqarashi keng, maʼnaviy dunyosi boy boʻlishi ham ahamiyatga ega. 

Kitob - dunyoning sakkizinchi moʻjizasi deya eʼtirof etilishi ham bejiz emas. U insoniyat taraqqiyotining asosini tashkil etadi. Kitob mutolaasi esa insonning nutq va muomala madaniyatini oshirishi bilan birgalikda ijobiy fikrlashini ham rivojlantiradi. Mikrokreditbankda tashkil etilgan kitob yarmarkasida  “TaskinKitoblar” brendidan rang-barang badiiy hamda ilmiy-ommabop nashrlar taqdim etildi. 

Eʼtiborli tomonida 17-dekabrda tashkil etilgan kitob yarmarkasida bank xotin-qizlari faollik koʻrsatgan boʻlsa, bugungi yarmarkada yigitlar tomonidan xarid qilingan kitoblar son jihatdan koʻproqni tashkil etdi. Eʼtibor berganimiz, ular sohaga oid iqtisodiy va siyosiy mazmundagi kitoblarni, shu bilan birga jahon adabiyotining durdona asarlaridan xarid qilishdi.

Abdulla Qodiriyning "Oʻtkan kunlar" romanini oʻqimagan odam boʻlmasa kerak. Asarning ingliz tilida chop etilgan kitobi ham bankimiz xodimlarida katta qiziqish uygʻotdi va ushbu kitobning bir qancha nusxasi hamyonbop narxlarda xarid qilindi. Fyodor Dostoyevskiy, Deyl Karnegi, Jorj Oruel, Erix Mariya Remarx, Jeyms Klir, Chingiz Aytmatov asarlari ham oʻz xaridorlariga ega boʻldi.

Bank Axborot xizmati