Bugungi raqamli transformatsiya jarayonida bank xizmatlarining qulayligi va samaradorligi muhim oʻrin tutadi. Ana shunday yangiliklardan biri sifatida omonat kartalarining joriy etilishini alohida taʼkidlash mumkin. Bu tashabbus tijorat banklari orasida birinchilardan bo‘lib, Mikrokreditbank faoliyatida yangi bosqichni boshlab berishi, mijozlarga esa yanada qulay va tezkor xizmatlarni taqdim etishga yoʻl ochishi kutilmoqda.
Omonat kartasi — bu anʼanaviy omonat daftarchasi oʻrnini bosuvchi, raqamli shakldagi zamonaviy karta boʻlib, UZCARD tizimi orqali amalga oshiriladi. Endilikda mijozlar bankka borib-kelish, qogʻozli daftarchalarni saqlash, foizlarni hisoblash uchun navbatda turish kabi anʼanaviy va noqulay jarayonlardan xalos boʻladi.
Omonat kartaning afzalliklari koʻp. Asosiysi, mijoz omonat daftarchasidan foydalanishga hojat qolmaydi. Bu esa bankda qogʻoz va printer xarajatlarini qisqartiradi.
Mijozlar bankning “Mavrid” mobil ilovasiga ulanib, barcha amaliyotlarni masofadan turib bajarishi mumkin. Bank xodimlari har oy mijoz foizlarini qogʻozga yozib berishdan xalos boʻladi. Bu xodimlar vaqtini tejaydi. Vaqt tejalishi natijasida koʻproq mijozlarga tezkor xizmat koʻrsatish va bank mahsulotlarini kengroq taklif etish imkoni paydo boʻladi. Mijozlar oʻz omonat mablagʻlarini toʻliq yoki qisman, istalgan vaqtda, omonat karta orqali qaytarib olish imkoniyatiga ega boʻladi. Bunday innovatsiyalar mijozlarni raqamli moliyaviy mahsulotlardan foydalanishga oʻrgatadi.
Omonat kartalarining joriy qilinishi — bu nafaqat texnologik yutuq, balki bank tizimidagi mijozga yoʻnaltirilgan yondashuvning amaliy ifodasidir. Yangi formatdagi xizmat koʻrsatish orqali banklar nafaqat ish samaradorligini oshiradi, balki raqobatbardoshligini ham mustahkamlaydi.
Bank Axborot xizmati
Yana ko‘ring
Bank kartangiz yoningizda yo‘q, lekin naqd pul kerakmi?
MKBANK va AQSH banki o‘rtasida uchrashuv bo‘lib o‘tdi
