“Mikrokreditbank” aksiyadorlik-tijorat banki tashabbusi va Respublika Oila va xotin-qizlar qoʻmitasi, "Hamroh" xotin-qizlar tadbirkorligini qo‘llab-quvvatlash kompaniyasi hamkorligida Nukus shahrida “Orzudan muvaffaqiyatgacha…” shiori ostida ikkinchi xotin-qizlar forumi oʻtkazildi.
Soʻnggi yillarda mamlakatimizda xotin-qizlarning huquq va manfaatlarini himoya qilish, gender tengligini ta’minlash, ular uchun yangi ish oʻrinlari yaratish, kasb-hunarga oʻrgatish, xotin-qizlar tadbirkorligini rivojlantirish hamda turmush sharoitlarini yaxshilash davlat siyosatining ustuvor yoʻnalishlaridan biriga aylandi.
Forumda qoraqalpogʻistonlik tadbirkor va ishbilarmonlar, shuningdek, tadbirkorlikka qiziqqan 250 nafardan ortiq xotin-qizlar ishtirok etdi. Tadbirda bank tomonidan xotin-qizlar tadbirkorligini moliyaviy qoʻllab-quvvatlash va ularning faoliyatini rivojlantirish borasida amalga oshirilayotgan ishlar haqida ma’lumot berildi.
Xususan, 2021–2024-yillarda “Mikrokreditbank” tomonidan oilaviy tadbirkorlikni rivojlantirish dasturlari doirasida 210 mingdan ortiq xotin-qizlarga 3,7 trln. soʻm imtiyozli kreditlar ajratildi. Shu jumladan, Qoraqalpogʻistonda 19 mingga yaqin xotin-qizlar uchun 267 mlrd. soʻm kredit yoʻnaltirildi.
2024-yilning oʻzida bank 89 592 nafar xotin-qizning biznesini moliyalashtirish uchun 1 trln. 604 mlrd. soʻm imtiyozli kredit ajratdi. Natijada 92 200 nafar ayolning bandligi ta’minlandi. Shuningdek, PQ-122-sonli qaror asosida Tiklanish va taraqqiyot jamgʻarmasidan mablagʻ jalb qilinib, 19 370 nafar xotin-qizga 253,2 mlrd. soʻm kredit berildi.
2024-yil 7-martda qabul qilingan 122-sonli Prezident qarori xotin-qizlar tadbirkorligini yangi bosqichga olib chiqishga qaratilgan muhim hujjatlardan biri boʻldi. Mazkur qaror asosida ayollarni biznesga jalb qilish va ularni qoʻllab-quvvatlash mexanizmlari aniq belgilab berildi.
Misol uchun, Nukus shahridagi “Qoskөl” mahallasining 2 148 nafar aholisi orasida xotin-qizlar faol tadbirkorlik bilan shugʻullanmoqda. Ular kasanachilik, hunarmandchilik, parrandachilik, hamshiralik kabi 15 ga yaqin yoʻnalishda oʻz biznesini yoʻlga qoʻygan. Yil boshidan buyon ushbu mahallada 92 nafar xotin-qizga bank tomonidan 841 mln. soʻmdan ortiq imtiyozli kredit ajratildi. Ularning aksariyati uydan chiqmagan holda tadbirkorlikni boshlashga muvaffaq boʻldi.
Forum doirasida Chimboy tuman hokimligi bilan hamkorlikda “Guliston” mahallasining tadbirkor ayoli Mavluda Alimbetova xonadonida amaliy seminar tashkil etildi. Seminarda jizzaxlik tajribali tadbirkor, “Oʻzbekistonda xizmat koʻrsatgan tadbirkor” Sharofat Noriyeva ishtirok etdi va mahalladagi 50 dan ortiq xotin-qizga gulchilik va dehqonchilikdan daromad topish sirlarini oʻrgatdi.
Ma’lumotlarga koʻra, mamlakatimizda iqtisodiyot va sanoat tarmoqlarida ayollar ulushi 46 foizni tashkil etadi. Shuningdek, 120 mingdan ziyod kichik biznes subyektlariga va 4 550 dan ortiq fermer xoʻjaliklariga ayollar rahbarlik qilmoqda. Kelgusi ikki yilda kichik va oʻrta biznesda xotin-qizlar ulushini 25 foizdan 40 foizga oshirish rejalashtirilgan.
Xotin-qizlarni qoʻllab-quvvatlashga qaratilgan tashabbuslar minglab ayollarning biznes-loyihalarini amalga oshirishga koʻmaklashmoqda. Bank 2025-yilda ham bu yoʻnalishdagi ishlar koʻlamini yanada kengaytirishni rejalashtirgan. Tadbirkorlik qilish istagida boʻlgan xotin-qizlar faoliyati muntazam oʻrganilib, ularga amaliy yordam koʻrsatib boriladi.
Eslatib oʻtamiz, “Orzudan muvaffaqiyatgacha…” forumi ilk bor Buxoro shahrida oʻtkazilgan edi.
Bank Axborot xizmati
Yana ko‘ring
Diqqat! MKBANK tizimida texnik ishlar olib borilmoqda!
MKBANK xodimi “MO‘TABAR AYOL” ko‘krak nishoni bilan taqdirlandi!
