Bugundan Ipak yo‘lida joylashgan qadimiy shahar Samarqandda yetakchi iqtisodchilar, nufuzli investorlar va xalqaro ekspertlarni jamlagan ikkinchi O‘zbekiston iqtisodiy forumi boshlandi. 

Unda O‘zbekistonning kelgusi besh yillik taraqqiyot strategiyasi, uning maqsadlari, istiqbollari, imkoniyatlari va vazifalarini muhokama qilinadi.

“Silk Road Samarkand” turistik markazida o‘tayotgan tadbirning asosiy mavzusi “Inson manfaatlarini iqtisodiy islohotlarning bosh mazmuniga aylantirish” deb e’lon qilindi.

Ta’kidlash joizki, forum doirasida “Mikrokreditbank” АTB va “Xususiy sektorni rivojlantirish islom korporatsiyasi” oʼrtasida 30 mln. dollarlik hamkorlik kelishuvi imzolanishi kutilmoqda. Mazkur kelishuv islomiy moliyalashtirish tamoyillari asosida kichik biznesni qoʼllab-quvvatlashni koʼzda tutadi.

Forumda Jahon banki mintaqaviy vitse-prezidenti Anna Bjerde, Osiyo taraqqiyot banki vitse-prezidenti Shixin Chen, Iqtisodiy taraqqiyot va kambag‘allikni qisqartirish vaziri Jamshid Qoʻchqorov, moliya vaziri Timur Ishmetov va boshqa ma’ruzachilar ishtirok etishi kutilmoqda.

Shuningdek, iqtisodiy o‘sishni ta’minlashda xususiy sektorning roli, o‘zgaruvchan muhitda pul-kredit va makroprudensial siyosat hamda yashil iqtisodiyotga o‘tish zarurati kabi mavzular ham forumning muhokama markazida bo‘lаdi.

Mazkur forum ertaga ham davom etadi.