Xalqimizda “Yer bitmas xazina, dehqon xazinabon” deya bejiz aytilmagan. Bugun mamlakatimizda ishsiz aholi vakillariga ishlab daromad topish, moddiy manfaat koʻrish uchun ekin yerlarini 30 yil muddatga ijaraga berish tartibi joriy qilingani oʻzini toʻla-toʻkis oqlamoqda.
Prezidentimizning “Dehqon xoʻjaliklari tashkil etishni qoʻllab-quvvatlash orqali aholi daromadlarini oshirish boʻyicha qoʻshimcha chora-tadbirlar toʻgʻrisida”gi hamda “Meva-sabzavotchilik va uzumchilikda oilaviy tadbirkorlikni rivojlantirish, qishloq xoʻjaligi ishlab chiqarishida dehqon xoʻjaliklari ulushini oshirish chora-tadbirlari toʻgʻrisida”gi qarorlari amaliy natijalarni bermoqda.
Mikrokreditbank ham “Bir kontur – bir mahsulot” tamoyili asosida tashkil etilgan loyihalarda faol qatnashib, tomorqa yer egalari, dehqon xoʻjaliklarini moddiy qoʻllab-quvvatlamoqda.
Ulardan biri Samarqand viloyati, Bulung‘ur tumani, Zarafshon mahallasidagi 10 gektar maydonda bulgʻor qalampiri yetishtirish boʻyicha yangi loyiha yoʻlga qoʻyilganidir.
Mazkur hudud 59 nafar dehqon xoʻjaligi oʻrtasida taqsimlanib, har bir ishtirokchiga 10 sotixdan yer berilgan. Hisob-kitoblarga koʻra, loyihadan jami 100 tonna hosil olinishi kutilmoqda. Bu esa bir dehqonning oʻrtacha 34 million soʻmgacha daromad olishi mumkinligini anglatadi.
“Mana koʻryapsiz — kim ishlayman desa, imkoniyat bor. Shaharda yashaysizmi yoki chekka qishloqda, har bir hududning iqlim va imkoniyatidan kelib chiqib yaxshi daromad topish mumkin. Faqatgina sabr, mehnat va harakat kerak” – deydi loyiha doirasida bulg‘or qalampiri yetishtirishni yo‘lga qo‘ygan dehqonlardan biri.
Mikrokreditbank tomonidan amalga oshirilayotgan “Bir kontur — bir mahsulot” loyihasi nafaqat dehqonlarni qoʻllab-quvvatlash, balki hududlardagi iqtisodiy faollikni oshirishga ham xizmat qilmoqda.
Bank Axborot xizmati
Yana ko‘ring
Rahbar va yoshlar uchrashuvi: tibbiyot muassasasida
Korporativ bank kartalari: tezkorlik, shaffoflik va qulay boshqaruv
