Joriy yilning 6-avgust kuni “Mikrokreditbank” ATB tashabbusi bilan Sirdaryo viloyatining Boyovut tumanida xotin-qizlar bandligini taʼminlash, ularni tadbirkorlik faoliyatiga jalb etish, muammo va murojaatlarini oʻrganish maqsadida tuman xotin-qizlari bilan uchrashuv tashkil etildi. Unda Boshqaruv raisi oʻrinbosari Ikrom Djumaniyozov, bankning Ijtimoiy dasturlarni amalga oshirish departamenti direktori Rashidmirza Xalilov, tuman hokimi, viloyat hamda tuman hokimligi masʼullari, mahalladagi xotin-qizlar faollari va yoshlar yetakchilari ishtirok etishdi.
Uchrashuv davomida dastlab xotin-qizlar tadbirkorligini qoʻllab-quvvatlash maqsadida joriy etilgan yangi paketlar, imtiyozli kreditlar va ulardan foydalanish tartibi boʻyicha taqdimot oʻtkazildi. Shundan soʻng uchrashuvga taklif etilgan xotin-qizlar bilan ochiq muloqot tashkil etildi. Ularga avval olgan kreditini soʻndirmasdan turib, qoʻshimcha kredit olish, skoring tahlillari to‘g‘risida va kredit olishda yuzaga kelayotgan muammolar yuzasidan tushuntirishlar berildi. Oʻz faoliyatini endi boshlash arafasida boʻlgan xotin-qizlarga imtiyozli kredit xizmatlari tavsiya etilib, ularning faoliyati doimiy nazoratga olinadigan boʻldi. Shuningdek, bank tomonidan amalga oshirilishi lozim bo‘lgan vazifalar kelishib olindi.
Uchrashuvdan keyin “Mikrokreditbank” ATB koʻmagida oʻz faoliyatini samarali tashkil etgan xotin-qizlar faoliyati bilan ham tanishildi. Madaniyat mahallasi, Donishmand koʻchasi 44-uyda istiqomat qiluvchi Shoira Azimova “Mikrokreditbank” ATBdan 26 million soʻm imtiyozli kredit olib, uy bogʻchasi tashkil qilgan. Kredit mablagʻlarini bogʻchani jihozlashga yoʻnaltirgan. Ayni paytda bu yerda 50 nafar bolajonlar tarbiyalanmoqda. Yaratilgan ishchi oʻrinlar soni esa 4 ta. Shoiraning keyingi rejalari bolalar sonini 100 nafarga yetkazib, oʻz faoliyatini yanada kengaytirish.
Taʼkidlash lozimki, bugungi kunda xotin-qizlar bandligini taʼminlash boʻyicha amaliy ishlarning salmogʻi Boyovut tumanidan sezilarli darajada ortdi. Dastur doirasida xotin-qizlarni kasbga oʻqitish va bandligini taʼminlash, ularni tadbirkorlikka keng jalb etish yuzasidan ishlar mutlaqo yangicha yondashuv asosida tashkil etildi. Natijada bugun Boyovut tumanidagi xotin-qizlar kasb-hunar, tadbirkorlik koʻnikmalari va moliyaviy savodxonlikka oʻqitilmoqda. Shu bilan birga bankning moliyaviy koʻmagi asosida oʻz ish faoliyatini yoʻlga qoʻyib, oilasiga daromad keltirmoqda.
“Mikrokreditbank” ATB tomonidan 2024-yilning oʻtgan davri mobaynida “Oilaviy tadbirkorlikni rivojlantirish dasturlari” doirasida 1-avgust holatiga ko‘ra Boyovut tumanidagi 745 nafar fuqaroga jami 12 mlrd. 336 mln. soʻm imtiyozli kredit mablagʻlari ajratilgan boʻlsa, shundan 6 mlrd 101 mln soʻmlik kredit 421 nafar xotin-qizlar tadbirkorligi uchun yoʻnaltirilgan. Prezidentimizning “Xotin-qizlarning tadbirkorligini yoʻlga qoʻyish va rivojlantirishni qoʻllab-quvvatlashga oid qoʻshimcha chora-tadbirlar toʻgʻrisida"gi qarori ijrosini taʼminlash maqsadida 120 nafar xotin-qizlar bankning imtiyozli kreditlaridan foydalanib, oʻz tadbirkorlik faoliyatini boshlashi uchun jami 1 mlrd. 654 mln. soʻm miqdorda pul mabalgʻlari ajratilgan.
Taʻkidlash kerakki, “Mikrokreditbank” ATB tomonidan Oʻzbekiston Respublikasi Prezidentining 2024-yil 7-martdagi "Xotin-qizlarning tadbirkorligini yoʻlga qoʻyish va rivojlantirishni qoʻllab-quvvatlashga oid qoʻshimcha chora-tadbirlar toʻgʻrisida"gi qarorining ijrosini taʼminlash maqsadiga qaratilgan amaliy ishlar davom etadi.
Bank Axborot xizmati
Boshqa yangiliklar
MKBANKda yutuqli aksiya!
