Surxondaryoga press-tur tashkil etildi

“Mikrokreditbank” aksiyadorlik-tijorat banki bugungi kunda oʼzining xorijiy kredit liniyalari orqali jalb qilingan mablagʼlari bilan iqtisodiyotning real sektori korxonalarini modernizatsiya qilish, texnik va texnologik qayta jihozlash hamda ishlab chiqarishni diversifikatsiyalashga doir investitsiya loyihalarini moliyaviy qoʼllab-quvvatlashga qaratilgan jarayonlarda faol ishtirok etib kelmoqda.

Mazkur saʼy-harakatlar koʼlamini kengaytirish maqsadida “Mikrokreditbank” АTB tomonidan moliyalashtirilgan Surxondaryo viloyatidagi “Аlpomish servis invest” xususiy korxonasiga 7-aprel sanasida bir guruh respublika va mahalliy ommaviy axborot vositalari vakillari ishtirokida press-tur tashkil etildi. Press-tur davomida ishtirokchilar korxonada tibbiy shpris ishlab chiqarish jarayoni bilan bevosita yaqindan tanishish imkoniga ega boʼlishdi. 


- Prezidentimiz Shavkat Mirziyoevning 2021-yilning 1-2-iyun kunlari Surxondaryo viloyatiga tashrifi davomida tasdiqlangan yigʼilish bayoniga asosan “Аlpomish Servis Invest” xususiy korxonasi tomonidan bir martalik tibbiy shpris ishlab chiqarish loyixasini amalga oshirish belgilab oʼtilgan. Shundan keyin korxonani tashkil etish va uni to'liq quvvatda ishga tushirish uchun harakat qildik, - deydi korxona rahbari Hasan Panjiyev. - Ayni paytda biz o'ylagan maqsadga erishdik. Korxonamizning 1 oylik foydasi 1,5 mlrd soʼmga teng. Hozirda korxona tuman aholisining 36 nafarini ish bilan taʼminlamoqda. 

“Аlpomish servis invest” XK bir martalik tibbiy shprit ishlab chiqarish faoliyatini tashkil etish boʼyicha “Mikrokreditbank” АTB tomonidan umumiy qiymati 2 940 000 (ikki million to‘qqiz yuz qirq ming) yevro miqdoridagi kredit mablagʼi ajratilgan. Ushbu mablagʼlar hisobidan Xitoy davlatining “SHAOXING B&R PIONEER IMP&EXP. CO. LTD.” korxonasi bilan xamkorlik yoʼlga qoʼyilib, shpiris ishlab chiqaruvchi uskuna sotib olingan hamda va 2022-yilning mart oyidan loyiha ishga tushirildi. 

Korxona to‘la quvvatda ishga tushgandan so‘ng 1 sutka davomida 400.000 dona shundan 2 ml shpris 100.000 dona, 5 ml shpris 200.000 dona, 10 ml shpris 100.000 dona bir martalik tibbiy shpris ishlab chiqarish yo‘lga qo‘yildi.

Maʼlumot uchun, “Mikrokreditbank” АTB tomonidan joriy yil boshidan beri tadbirkorlik subyektlarining investitsion loyihalarini moliyalashtirish uchun 66ta loyihaga 376 mlrd so‘m ekvivalentida mablagʼlar ajratildi. Shuningdek, yil yakuniga qadar bank tomonidan istiqbolli loyihalarni moliyaviy qoʼ‘lab-quvvatlash borasida ishlar olib borilmoqda.

Bank Axborot xizmati