Oʻzbekiston Respublikasi Oliy Majlis Senati rasmiy saytida keltirilgan maʼlumotlarga koʻra, bugun yurtimizda ishbilarmon ayollar safi ikki barobar koʻpayib, oʻz biznesini yoʻlga qoʻygan tadbirkor xotin-qizlar soni 200 mingdan oshdi. Iqtisodiyot va sanoat tarmoqlarida ayollar ulushi 46 foizni tashkil etmoqda. Kichik biznes subyektlarining 120 mingdan ziyodini, fermer xoʻjaliklarining 4 550 dan ortigʻini xotin-qizlar boshqarmoqda. Prezidentimiz Farmoni bilan joriy yildan boshlab ayollarning kichik biznes va xususiy tadbirkorligini tashkil etish uchun 100 million dollar ajratildi. Kelgusi ikki yilda kichik va oʻrta biznesda xotin-qizlarning ulushini hozirgi 25 foizdan 40 foizga oshirish boʻyicha ulkan maqsad qoʻyilgan. Ayniqsa, xotin-qizlarni qoʻllab-quvvatlash, ularni har tomonlama koʻmak berishga qaratilgan tashabbuslar minglab opa-singillarimizning biznes loyihalarini amalga oshirishlarida turkti boʻlmoqda. Bu borada “Mikrokreditbank” ATB tomonidan ham amaliy ishlar olib borilmoqda. Mavzuni Toshkent viloyati, Boʻstonliq tumani misolida davom ettiramiz.
Bank moliyaviy koʻmagida biznesga birinchi qadam qoʻygan, tadbirkorlik faoliyatini yanada kengaytirayotgan, ishchi oʻrinlari yaratish orqali aholi bandligini taʼminlashga oʻz hissasini qoʻshayotgan opa-singillarimiz Boʻstonliq tumanida ham talaygina. Shulardan biri “Issiqsuv” mahallasida istiqomat qiluvchi Zulxumor Iroyeva 10 yildan buyon tadbirkorlik faoliyati bilan shugʻullanadi. Mehmon uylari tashkil etish loyihasi orqali oʻz faoliyatini yanada kengaytirgan Zulxumor Iroyevaga bugungi kunda Mikrokreditbank tomonidan mehmon uyini jihozlash uchun 300 million soʻm miqdorda imtiyozli kredit ajratildi. Natijada tadbirkor joriy mavsumda sayyohlarga xizmat koʻrsatishga ham ulgurdi.
- Ilgari savdo ishlari bilan shugʻullanar edim. Bizning mahallamiz turizmga ixtisoslashgan boʻlsa-da, bu sohaga eʼtibor hozirgidek boʻlmagan. Oʻtgan yillar davomida mehmon uylari tashkil etdik. Sizlar tashrif buyurgan mehmon uyimiz - ikkinchisi. Men har doim Mikrokreditbankning moliyaviy koʻmagiga tayanib loyihalarimni amalga oshiraman. Hozirda 6 ta yangi ishchi oʻrni yaratdim. Bank qoʻllab-quvvatlab tursa, kelgusida mehmon uylari tarmogʻini ham tashkil qilish rejalarim bor, - deydi Zulxumor opa.
Bugungi kunda xotin-qizlarimiz kirib bormagan soha qolmadi. Ularni har bir jabhada samarali faoliyat olib borayotganligiga guvoh boʻlyapmiz. Xumson mahallasida istiqomat qiluvchi Matluba opa Roʻziyeva ham bugungi kunning eng faol tashabbuskor va gʻayratli tadbirkor ayollari safida. U bogʻdorchilik, parrandachilik va asalarichilik kabi yoʻnalishlarda faoliyat olib boradi. Mikrokreditbank tomonidan mazkur faoliyat uchun imtiyozli kreditlar ajratilgan. Uning aytishicha, 1,5 gektar maydonda 20 dan ortiq mevali va 5 turdagi manzarali daraxt koʻchatlari yetishtirish hamda asalarichilik faoliyati orqali bir oyda 15-20 million soʻmlik daromad oladi. Malika opaning maqsadi tabiiy togʻ asali mahsuloti orqali Turkiya bozorini zabt etish.
Oʻzbekiston Respublikasi Prezidentining joriy yil 7-martdagi 122-sonli “Xotin-qizlarning tadbirkorligini yoʻlga qoʻyish va rivojlantirishni qoʻllab-quvvatlashga oid qoʻshimcha chora-tadbirlar toʻgʻrisida”gi qarori Oʻzbekistonda ayollar tadbirkorligini yangi bosqichga koʻtarishga, biznes vakilalarini qoʻllab-quvvatlashga xizmat qilmoqda. Mikrokreditbank tomonidan Respublika boʻyicha “Oilaviy tadbirkorlikni qoʻllab-quvvatlash” dasturlari doirasida joriy yilning 11-sentabr holatida 90 mingdan ortiq tadbirkorlik subyektlariga 1 trillion 514 milliard soʻm imtiyozli kreditlar ajratilib, uning 776 milliard soʻmi xotin-qizlar tadbirkorligi uchun yoʻnaltirildi. Ushbu kreditlarning 3 milliard 734 milllion soʻmi Boʻstonliq tumanidagi 172 nafar xotin-qizlar tadbirkorligini qoʻllab-quvvatlashga ajratildi.
Yurtimizda qaysi tarmoq boʻlmasin, unda dadil ish boshlab, oʻz biznesini tashkil etayotgan xotin-qizlar safi yil sayin kengayib boryapti. Buni esa ushbu yoʻnalishga berilayotgan keng imkoniyatlar, ajratilayotgan katta mablagʻlar, muhimi, ayollarga bildirilayotgan ulkan ishonch mahsuli, deyish mumkin. “Mikrokreditbank” ATB tomonidan ayollar tadbirkorligini qoʻllab-quvvatlash boʻyicha ishlar respublikamizning boshqa hududlarida ham davom etadi.
Bank Axborot xizmati
Yana ko‘ring
MKB Premium Plus — biznes uchun qulayliklar bir paketda
MKBANKda Ria xalqaro pul o‘tkazmalarini yevroda olish imkoniyati yaratildi
MKBANK xodimi nufuzli musobaqada 4-o‘rinni egalladi!
Mazkur musobaqada barcha vazirlik va idoralarning 120 nafardan ortiq xodimlari FIDE qoidalari asosida bahslashdi.
