So‘nggi yillarda O‘zbekistonda xotin-qizlarning huquq va manfaatlarini himoya qilish, gender tenglikni ta’minlash, ular uchun yangi ish o‘rinlari yaratish hamda tadbirkorlikka jalb qilish kabi masalalar davlat siyosati darajasiga ko‘tarildi. Ayniqsa, Prezidentimizning sa’y-harakatlari tufayli xotin-qizlar uchun yangi imkoniyatlar eshigi ochildi. Shu qatorida “Mikrokreditbank” ATB xotin-qizlar tadbirkorligini rivojlantirish va moliyaviy qo‘llab-quvvatlashni o‘zining ustuvor vazifalaridan biri sifatida belgilab kelmoqda.
Keng qamrovli moliyaviy qo‘llab-quvvatlash
2024-yil davomida bank tomonidan har bir viloyat va tumanlarda yangi biznes g‘oyalariga ega xotin-qizlarni aniqlash, ularning tashabbuslarini amalga oshirishga ko‘maklashish maqsadida jiddiy ishlar olib borildi. Xususan, oilaviy tadbirkorlikni rivojlantirish dasturlari doirasida 77 752 nafar xotin-qizga 1,175 trillion so‘mlik imtiyozli kreditlar ajratildi. Bu mablag‘lar 78 mingdan ortiq xotin-qizning bandligini ta’minlashga xizmat qildi.
Shuningdek, Tiklanish va taraqqiyot jamg‘armasi hisobiga ajratilgan 252 milliard so‘m resurs mablag‘lari orqali 19 372 nafar xotin-qiz o‘z biznesini yo‘lga qo‘ydi. Masalan, Sirdaryo viloyatining Navro‘z mahallasida istiqomat qiluvchi Munira Dulonova asalarichilik sohasida katta muvaffaqiyatlarga erishgan tadbirkorlardan biri. Bank ajratgan 33 million so‘mlik kredit tufayli faoliyatini boshlagan Munira opa keyinchalik yana 30 million so‘mlik imtiyozli kredit orqali ishlab chiqarish hajmini oshirib, 50 ta asalari oilasi yetishtirdi.
Targ‘ibot va o‘quv tadbirlari Sirdaryo viloyati misolida
Bank faqat moliyaviy ko‘mak berish bilan cheklanib qolmasdan, muntazam ravishda targ‘ibot va o‘quv tadbirlarini o‘tkazib kelmoqda. Xususan, 2024-yilning 27-sentyabrida “Mikrokreditbank” ATB rahbariyati Sirdaryo viloyatining Sardoba tumaniga tashrif buyurib, xotin-qizlar bilan ochiq muloqot tashkil qildi. Uchrashuv davomida tadbirkorlikni qo‘llab-quvvatlashga oid yangi mahsulotlar va ulardan foydalanish tartibi bo‘yicha ma’lumotlar berildi.
Sardoba tumanidagi Monomarkazda xotin-qizlarni tadbirkorlik ko‘nikmalariga o‘rgatish ishlari yuqori samara berdi. Bugungi kunga kelib, ushbu tumanda 900 nafarga yaqin xotin-qiz kasb-hunar, tadbirkorlik ko‘nikmalari va moliyaviy savodxonlik bo‘yicha o‘quv kurslarini muvaffaqiyatli tamomladi.
Ta’kidlash lozimki, bugungi kunda xotin-qizlar bandligini ta’minlash bo‘yicha amaliy ishlarning salmog‘i Sardoba tumanida sezilarli darajada ortdi. Dastur asosida xotin-qizlarni kasbga o‘qitish va bandligini ta’minlash, ularni tadbirkorlikka keng jalb etish bo‘yicha ishlarni mutlaqo yangicha yondashuvlar va tizim asosida tashkil etilishi bo‘yicha mahallalar kesimida manzilli rejalar belgilab olindi. Natijada esa bugungi kunda Sardoba tumanidagi 900 nafarga yaqin xotin-qizlar kasb-hunar, tadbirkorlik ko‘nikmalari va moliyaviy savodxonlikka o‘qitildi.
Ana shu kabi tadbirlar, ochiq muloqotlar Sirdaryo viloyatining Sayxunobod va Boyovut tumanlarida ham tashkil etildi. Bank rahbariyati ishtirokida tegishli mas’ul tashkilotlar bilan birgalikda ayol tadbirkorlar hamda tadbirkorlik faoliyatini boshlash istagida bo‘lgan xotin-qizlar bilan uchrash-muloqotlar o‘tkazildi. Uchrashuvlar davomida xotin-qizlar muammo va takliflari o‘rganilib, hal etish chorlari ko‘rildi.
Strategik rejalar
Hozirgi kunda iqtisodiyot va sanoat tarmoqlarida ayollar ulushi 46 foizni tashkil etayotgani e’tirofga loyiqdir. Kelgusi ikki yil davomida kichik va o‘rta biznesda xotin-qizlarning ulushini 25 foizdan 40 foizga yetkazish ko‘zlangan. Bunda bankning tizimli yondashuvlari, hududiy muloqotlar va manzilli rejalar asosida amalga oshirilayotgan ishlar hal qiluvchi ahamiyatga ega.
Xulosa
“Mikrokreditbank” ATBning xotin-qizlarni qo‘llab-quvvatlashga qaratilgan tashabbuslari nafaqat ularning iqtisodiy mustaqilligini ta’minlashga, balki milliy iqtisodiyotga ulkan hissa qo‘shishga qaratilgandir. Tadbirkorlikka oid ochiq muloqotlar, forumlar va o‘quv dasturlari orqali ko‘plab ayollar o‘z orzularini ro‘yobga chiqarmoqda. Bankning sa’y-harakatlari natijasida yuzlab xotin-qizlar o‘z biznesini boshladi va yurtimiz ravnaqi uchun hissa qo‘shmoqda.
Bank Axborot xizmati
Yana ko‘ring
Bank fuqarolardan kredit mablag‘lari yechib olish masalasini qonunchilikda belgilangan tartibda o‘rganmoqda
Shu o‘rinda ta’kidlash lozimki, bank tomonidan kredit mablag‘lari amaldagi tartib va tegishli hujjatlar asosida ajratilgan.
Texnik muammolarga onlayn yechim!
MKBANKda bank tizimi islohotlari va yangi rivojlanish bosqichi mavzusida matbuot anjumani tashkil etildi
Bugun bank tomonidan ikkilamchi bozordan uy-joy sotib olish uchun 21,55 foizdan boshlab ipoteka kreditlari ajratilishi yoʻlga qoʻyildi.
