Ijtimoiy tarmoqlarda tarqalgan “Mikrokreditbank” Juma filiali tomonidan "Kichkintoylar" NTMga zo'ravonlik ishlatilganligi yuzasidan “Mikrokreditbank” ATB quyidagilarni ma’lum qiladi.
Mazkur holat bo’yicha murojaat bank tomonidan amaldagi qonunchilik talablari asosida batafsil o’rganildi.
Aniqlanishicha, “MAHALLA KICHKINTOYLARI” nodavlat ta’lim muassasasiga 2021-yilda imzolangan kredit shartnomalari asosida jami 1 mlrd 523 mln so’m miqdorida imtiyozli kredit ajratilgan. Kredit ta’minoti sifatida garovga qo’yilgan ko’chmas mulk bo’yicha tegishli garov shartnomalari rasmiylashtirilgan.
Kredit shartnomasi shartlariga muvofiq, qarzdor tomonidan to’lovlar o’z vaqtida amalga oshirilmaganligi sababli bank qonunchilikda belgilangan tartibda sudga murojaat qilgan. Fuqarolik ishlari bo’yicha Pastdarg’om tuman sudining hal qiluv qarori bilan kredit qarzdorligini undirish hamda undiruvni garov mulkiga qaratish belgilangan.
Sud qarori asosida ijro hujjati Majburiy ijro byurosiga yuborilgan. Ijro harakatlari davomida garov mulki elektron onlayn-auksion savdolariga chiqarilgan, biroq xaridorlar tomonidan qiziqish bildirilmaganligi sababli sotilmagan.
Amaldagi qonunchilikka muvofiq, takroriy auksionlarda realizatsiya qilinmagan garov mulki undiruvchiga belgilangan tartibda taklif etiladi. Shu asosda Majburiy ijro byurosining taklifiga binoan mazkur ko’chmas mulkni bank balansiga natura shaklida qabul qilish bo’yicha qonuniy tartibdagi ishlar amalga oshirilmoqda.
Shuningdek, murojaatchining boshqa ijro hujjatlari bo’yicha qarzdorliklari mavjudligi sababli, Majburiy ijro byurosi tomonidan qonunchilikda nazarda tutilgan tartibda nafaqa to’lovlari va bank kartasiga nisbatan tegishli ijro choralari qo’llanilgan.
“Mikrokreditbank” ATB barcha harakatlarni faqat amaldagi qonunchilik, sud qarorlari hamda vakolatli davlat organlari hujjatlari asosida amalga oshiradi. Bank manfaatdor tomonlarning huquqlarini hurmat qiladi hamda fuqaro qabul qilingan qarorlar yoki ijro harakatlaridan norozi bo’lgan taqdirda ularni qonunchilikda belgilangan tartibda vakolatli organlar yoki sud orqali ko’rib chiqish huquqiga ega ekanligini eslatib o’tadi.
Bank Axborot xizmati
See also
Firibgarlar faol bo‘lishi mumkin — ehtiyot bo‘ling!
Mijozlar bilan ochiq muloqot:MKBANK aloqa kanallari orqali kelib tushgan murojaatlarni tahlil qildi
