Yoshlar bandligi banklar e’tiborida

Markaziy bank tomonidan Milliy matbuot markazida “Ta'lim muassasalari bitiruvchilarining biznes g'oyalari banklar e'tiborida mavzuida matbuot anjumani tashkil etildi.

Unda Oliy Majlis deputatlari, tijorat banklarining mas'ul xodimlari, “Kamolot” yoshlar ijtimoiy harakatining rahbarlari ishtirok etdi.

Mamlakatimizda aholi, xususan yoshlar bandligini ta'minlash davlat siyosati darajasiga olib chiqilgan. Bandlik masalasi ijtimoiy siyosatning muhim tarkibiy qismi sifatida odamlarning daromadlarini oshirishga yordam berish, turmush farovonligini oshirish, ish salohiyatini yanada to'laroq namoyon etishi uchun iqtisodiy sharoitlarni yaratishga qaratilgan. Ayni maqsadlarga erishish uchun mamlakatimizda kichik biznes va xususiy tadbirkorlikni rivojlantirishga katta ahamiyat berilmoqda.

Davlatimiz rahbarining “Ta'lim muassasalarining bitiruvchilarini tadbirkorlik faoliyatiga jalb etish borasidagi qo'shimcha chora-tadbirlar to'g'risida”gi farmonida kichik biznes va xususiy tadbirkorlikni rivojlantirishni yanada rag'batlantirish, yoshlarni, avvalambor kasb-hunar kollejlari, akademik litseylar va oliy ta'lim muassasalari bitiruvchilarini tadbirkorlik faoliyatiga keng jalb etish uchun qator imtiyozlar, kafolatlar va huquqlar belgilab berildi.

Belgilangan chora-tadbirlar doirasida Markaziy bank, Mehnat va aholini ijtimoiy himoya qilish vazirligi, “Kamolot” yoshlar ijtimoiy harakati va mahalliy hokimiyatlar bilan birgalikda yangi ish o'rinlari tashkil etish bo'yicha aniq manzilli dasturlar ishlab chiqildi. Bunda tijorat banklari tomonidan tadbirkorlik sub'ektlarining ishlab chiqarishni kengaytirish, yangi ish o'rinlari tashkil etish ko'zda tutilgan loyihalarini moliyalashtirishga alohida e'tibor qaratilmoqda.

Birgina joriy yilning o'tgan yarim yilligida banklar tomonidan kasb-hunar kollejlari bitiruvchilarining tadbirkorlik faoliyatini yo'lga qo'yishlari uchun 76,8 mlrd so'm, ya'ni o'tgan yilning shu davriga nisbatan 1,4 baravar ko'p miqdorda kreditlar ajratildi. Natijada joylarda 8,5 mingga yaqin bitiruvchilar ish bilan ta'minlandi yoki o'z biznesini boshlashga muvaffaq bo'ldi.

Bunda tijorat banklarida kollej bitiruvchisining mikrokredit olish uchun ta'minoti etarli bo'lmagan taqdirda, yaqin qarindoshlarining (ota-ona, aka-uka, opa-singil) ish haqi to'g'risidagi ma'lumotnomani taqdim etish orqali kafillik berish amaliyoti joriy etilgani o'z samarasini bermoqda.

Banklarning yangi ish o'rinlari yaratishga bo'lgan e'tibori faqat ta'lim muassasalarini bitiruvchilarning loyihalarini oliyalashtirish bilan cheklanmaydi. Kredit tashkilotlari tomonidan joriy yilda kichik biznes va xususiy tadbirkorlikni qo'llab-quvvatlashga 7,5 trln so'm miqdorida, iqtisodiyot real sektori korxonalarini texnik va texnologik qayta jihozlash hamda yangi ishlab chiqarishlarni tashkil etish uchun 8 trln so'mdan ortiq investitsion kreditlar ajratilishi belgilangan. Bu mablag'lar evaziga boshqa tadbirkorlik sub'ektlarida ham qo'shimcha ish o'rinlari tashkil etishga sharoit yaratiladi.

Yoshlarni tadbirkorlikka jalb etishda banklar tomonidan mahalliy hokimliklar va jamoat tashkilotlari bilan birgalikda uyushtirayotgan ommaviy tadbirlarning ahamiyati katta bo'lmoqda. Mazkur tadbirlar doirasida joriy yilning o'tgan davr mobaynida tijorat banklari tomonidan 26,6 mlrd so'mga teng biznes-rejalarni moliyalashtirish uchun 500 dan ortiq yosh tadbirkorga imtiyozli kredit olish huquqini beruvchi sertifikatlar topshirildi, shundan kasb-hunar kollejlari bitiruvchilari 400 nafarni tashkil etdi va ularning 4,3 mlrd so'mlik loyihalari imtiyozli shartlarda moliyalashtirildi.

Yoshlarning ijtimoiy-iqtisodiy faolligini oshirish, ularning mamlakatimiz kelajagini yaratish yo'lidagi izlanishlari, tadbirkorlik va ishbilarmonlik ko'nikmalarini muntazam oshirish, yoshlar tomonidan yaratilayotgan innovatsion loyihalarni xususiy sektor faoliyatiga keng jalb qilish maqsadida banklar jamoat tashkilotlari bilan faol hamkorlik qilib kelmoqda.

O‘zLiDeP partiyasi bilan hamkorlikda amalga oshirilayotgan “Diplom bilan biznesga” loyihasi doirasida ta'lim muassasalarining 1000 dan ortiq bitiruvchisiga tijorat banklari tomonidan o'tgan yillarda 4,5 mlrd. so'm miqdorida imtiyozli kredit mablag'lari ajratildi. Shuningdek, 4,5 ming nafar bitiruvchilarning tadbirkorlik va ishbilarmonlikka oid bilimlari oshirildi.

Banklar yoshlar bandligini ta'minlashda oilaviy tadbirkorlik va kasanachilikning rivojlanishiga ham xayrixohlik bilan qarashmoqda. Xotin-qizlar qo'mitasi, “Hunarmand” uyushmasi bilan hamkorlikda olib borilayotgan ishlar bozor iqtisodiyotini harakatlantiruvchi kuch – mulkdorlar safining kengayishi, bozorni iste'mol tovarlari va turli xizmatlar bilan boyitish, yoshlarni ish bilan ta'minlash va ularning daromadlarini oshirishga xizmat qilmoqda.