Tadbirkor xotin-qizlar qo‘llab-quvvatlanmoqda

Currency	Purchase	Sale	CBU
USD	12020	12110	12051.71
EUR	13500	14050	14008.91
RUB		155	154.69
GBP	15700	16700	16156.52
CHF	14500	15500	15087.27
JPY	70	100	76.31

Poytaxtimizda O‘zbekiston Markaziy banki tomonidan xotin-qizlar tadbirkorligini har tomonlama qo‘llab-quvvatlashda banklarning o‘rniga bag‘ishlangan yig‘ilish o‘tkazildi.

Mamlakatimizda xotin-qizlarning ijtimoiy-iqtisodiy hayotdagi o‘rni tobora yuksalayotgani, tadbirkor ayollarning iqtisodiy jarayonlardagi faolligi oshayotgani alohida qayd etildi. Davlatimiz rahbarining 2004-yil 25-maydagi «O‘zbekiston Xotin-qizlar ko‘mitasi faoliyatini qo‘llab-quvvatlash borasidagi qo‘shimcha chora-tadbirlar to‘g‘risida»gi farmoni bu borada muhim ahamiyat kasb etmoqda.

Bugungi kunda O‘zbekistonda faoliyat yuritayotgan tadbirkorlarning 35, fermerlarning 10 foizini xotin-qizlar tashkil etadi. Tadbirkorlik subyektlarini mikrokreditlashga oid me’yoriy-huquqiy baza yaratilgani tadbirkor ayollar faoliyatini rivojlantirish uchun zarur moliyaviy resurslarni ajratishda qo‘l kelmoqda.

O‘zbekiston Xotin-qizlar qo‘mitasi va Markaziy bank hamkorligida qator chora-tadbirlar rejasi ishlab chiqilgan. Unga ko‘ra, xotin-qizlarni ish bilan ta’minlash, ayollar tadbirkorligining barcha shakllarini rivojlantirish, moliyaviy qo‘llab-quvvatlash, huquqiy bilimlarini oshirish, xorijiy tajribalar bilan tanishish hamda tijorat banklarining imtiyozli kredit mablag‘lari evaziga tadbirkorlik tashabbuslarini qo‘llab-quvvatlash choralari ko‘rilmoqda.

– 2014-yilda tadbirkor ayollarga salkam bir trillion so‘mga yaqin kreditlar ajratilib, 2013-yilga nisbatan qariyb 1,4 barobarga o‘sish ta’minlandi, – deydi Markaziy bankning tijorat banklarining kreditlash portfelini monitoring qilish departamenti direktori o‘rinbosari Zafar Azimov. – Sanoat, qishloq xo‘jaligi, xizmat ko‘rsatish sohalariga yo‘naltirilayotgan mazkur kredit mablag‘lari evaziga minglab xotin-qizlar o‘z biznesiga ega bo‘lib, oilalarning turmushi farovonligi oshmoqda. Tijorat banklari mazkur mablag‘larni ajratishda qishloq joylarida ayollar boshqarayotgan, ularning mehnatidan foydalanilayotgan kichik korxonalarni rivojlantirish, qishloq xo‘jalik mahsulotlarini yetishtirish va qayta ishlashni rag‘batlantirish, kasanachilik va yangi ish o‘rinlarini yaratishiga qaratilgan loyihalarni qo‘llab-quvvatlashga alohida e’tibor qaratmoqda. Joriy yilda ham ushbu yo‘nalishlarga bir trillion so‘mdan ziyod kreditlar ajratilishi ko‘zda tutilgan.

2014-yilda tijorat banklari ayollarning turmush sharoitini yaxshilash uchun ham sarmoyalar yo‘naltirdi. Jumladan, mahalliy uy-ro‘zg‘or buyumlari xarid qilish uchun 57 milliard so‘mdan ortiq kreditlar ajratildi. Shuningdek, «Qoraqalpoq ayollarining iqtisodiy bilimlarini hayotga keng tatbiq etish» loyihasi doirasida «Tikozek», «Bozatau», «Madeli» qishloq fuqarolar yig‘inlarida istiqomat qilayotgan 110 nafar ayolga tadbirkorlik faoliyati bilan shug‘ullanishi uchun bank tomonidan 220 million so‘m miqdorida boshlang‘ich kredit ajratildi.

Tadbirda tijorat banklarining tadbirkor xotin-qizlarning biznes rejalarini moliyalashtirishdagi o‘rni, aholi turmush farovonligini oshirishga qaratilgan ustuvor vazifalar ijrosi va aholi bandligini ta’minlash masalalarida ishtiroki yuzasidan fikr-mulohazalar bildirildi.

Manba: O‘zbekiston Milliy axborot agentligi (O‘zA)

Vote