Mutaxassislarning ta’kidlashicha, inson sog‘lom bo‘lishi uchun bir yilda o‘rtacha 10 kilogramm parranda go‘shti va 100 dan ortiq tuxum iste’mol qilishi zarur. Chunki ular parhez mahsulotlari hisoblanib, inson organizmi uchun juda foydalidir.
Parranda go‘shti tez hazm bo‘lish xususiyatiga ko‘ra barcha turdagi chorva mollari go‘shtidan ustun turadi. Tarkibi har xil kimyoviy elementlarga boy. Mazkur elementlarni hisobga olgan holda, mamlakatimizda ham parrandachilik sohasining rivoji bo‘yicha izchil ishlar amalga oshirilmoqda.
O‘zbekiston Respublikasi Prezidentining “Parrandachilikni rivojlantirish va tarmoq ozuqa bazasini mustahkamlashga qaratilgan qo‘shimcha chora–tadbirlar to‘g‘risida” 2021-yil 14-iyundagi PQ-5146-sonli qarori bilan respublikada oziq-ovqat xavfsizligini taʼminlash shuningdek, parrandachilik yo‘nalishidagi tadbirkorlik subyektlarini qo‘llab-quvvatlash maqsadida bir qator imtiyozlar berildi.
Jumladan, qo‘shimcha qiymat solig‘i to‘lovchisi bo‘lgan parrandachilik xo‘jaliklariga – o‘z xo‘jaliklarida yetishtirilib, realizatsiya qilingan tuxumning har bir donasi uchun 50 so‘m hamda parranda go‘shtining har bir kilogrammi uchun 2500 so‘m (24.01.2022 y. PQ-100) miqdorida respublika byudjetidan subsidiya ajratish joriy etildi.
Shuningdek, parrandachilik sohasida faoliyat yuritayotgan korxonalarga banklar tomonidan ajratilayotgan kreditlar bo‘yicha imtiyozlar berildi. Xususan, 2025-yil 1-yanvarga qadar quyidagi maqsadlar uchun ajratilayotgan kredit bo‘yicha Tadbirkorlik faoliyatini qo‘llab-quvvatlash davlat jamg‘armasi hisobidan:
-
omuxta yem va parrandachilik mahsulotlari ishlab chiqaruvchi kichik tadbirkorlik subyektlariga aylanma mablag‘larni to‘ldirish uchun tijorat banki tomonidan ajratiladigan 10 milliard so‘mgacha bo‘lgan kredit foiz stavkasining Markaziy bank asosiy stavkasidan oshgan, biroq 8 foiz punktidan ortiq bo‘lmagan qismi;
-
parrandachilik loyihalarini amalga oshirish uchun tijorat banki tomonidan ajratiladigan 10 milliard so‘mgacha bo‘lgan kredit foiz stavkasining Markaziy bank asosiy stavkasidan oshgan, biroq 8 foiz punktidan ortiq bo‘lmagan qismi qoplab beriladi.
Shu bilan birga, kam quvvatda ishlayotgan korxonalarning to‘liq quvvatda ishlashini taʼminlash va ozuqa zahirasini shakllantirish maqsadida quyidagilar uchun kreditlar ajratilishi belgilangan:
-
parrandachilik xo‘jaliklari va ozuqa-em mahsulotlarini ishlab chiqaruvchi korxonalarda mavjud quvvatlarni to‘liq ishga tushirish uchun 24 oygacha bo‘lgan muddatga aylanma mablag‘ ajratish va modernizatsiya qilish;
-
«Mikrokreditbank» АTBga yo‘naltiriladigan maqsadli mablag‘lar hisobiga boshqa tijorat banklari orqali tadbirkorlik subyektlariga ajratiladigan kreditlar ham moliyalashtirilishi mumkin. Mikrokreditbank tomonidan qaror bilan belgilangan vazifalar ijrosini taʼminlash maqsadida bir qator chora-tadbirlar amalga oshirilmoqda.
Jumladan, hududlarda mahalliy hokimliklar bilan birgalikda mavjud parrandachilik korxonalari faoliyati inventarizatsiyadan o‘tkazilib, ularning mavjud ishlab chiqarish salohiyatini tiklash va yanada oshirish bo‘yicha aniq chora-tadbir belgilab olindi. Xususan: o‘tkazilgan qo‘shimcha o‘rganishlar natijasiga ko‘ra, parranda ozuqasi zahirasini zahira qilish va ishlab chiqarish quvvatlarini oshirish uchun hududlardan 201 ta tadbirkorlik subyektlari bo‘yicha (181 tasiga ozuqa uchun aylanma mablag‘lar va 20 tasiga modernizatsiya uchun) 800 mlrd.so‘m bank kreditiga talab shakllandi.
O‘tgan davr mobaynida ushbu talab asosida jami 179 ta loyihaga 438,6 mlrd. so‘m kreditlar ajratib berildi.
Shuningdek, parrandalar uchun ozuqa-yem ishlab chiqarishni qo‘llab-quvvatlash maqsadida, yillik quvvati 181 ming tonna tayyor ozuqa ishlab chiqarishni tashkil etish uchun 5 ta loyihaga jami 80,3 mlrd. so‘m kreditlar berildi.
Mazkur loyihalar to‘liq amalga oshirilishi evaziga yiliga 1,3 mlrd. dona tuxum va 74 ming tonna parranda go‘shti yetishtirish hamda 180,5 ming tonna tayyor ozuqa ishlab chiqarish quvvatlari yaratiladi.
Parrandachilik yo‘nalishda loyihalarni moliyaviy qo‘llab-quvvatlash bo‘yicha bank tomonidan ishlar davom ettirilmoqda.
See also
“Микрокредитбанк”: 12 минг нафарга яқин хотин-қизларнинг бандлиги таъминланди
